Einstaklingsæfingar næstu fimmtudaga

Einstaklingsæfingarnar hófust í dag og verða vikulega héðan í frá á fimmtudögum kl. 15-16 í Bjarkarhúsinu. 7. flokkur drengja mun senda 2 stráka hvern fimmtudag. Dagskráin er eftirfarandi:

30.9 Magni og Anton (Anton missti af æfingunni fyrir misskilning)
7.10 Anton og Siggi
14.10 Engin æfing, Ívar erlendis
21.10 Bjarki og Brynjar
28.10 Yngvi og Gulli
4.11 Jökull og Logi
11.11 Pétur og Fannar
18.11 Daði og Eiður
25.11 Jason og Henning

Ef einhver kemst ekki á ofangreindum tíma þá þarf að láta mig vita, svo við getum nýtt tímann fyrir aðra.

Breyting á æfingatíma sunnudaginn 3. október

Æfingin sunnudaginn 3. október verður kl. 14-15 í Hraunvallaskóla. Ástæða þess er að seinna þann dag verður evrópuleikur hjá meistaraflokki karla í handbolta á Ásvöllum.

Íbúagáttin - opin 1.-15. okt.

Minni á að þann 1. október opnar á ný fyrir umsóknir um íþrótta- og tómstundastyrki.

Frestur til að staðfesta þátttöku vegna haustannar 2010 (sept. – des.) er til og með 15. október. Gáttin er aðeins opin einu sinni á þessu tímabili.

Með staðfestingu í gegnum Íbúagáttina samþykkir forráðamaður barns að Hafnarfjarðarbær greiði viðkomandi félagi niðurgreiðsluna vegna þátttöku barnsins í námskeiði á vegum félagsins.

Nánari upplýsingar um íþrótta- og tómstundastyrkina eru í Íbúagáttinni, www.hafnarfjordur.is , en einnig hjá Þjónustuveri Hafnarfjarðarbæjar í síma 585-5500 og hjá Íþróttabandalagi Hafnarfjarðar í síma 555-2300.

Einnig er hægt að hringja í íþróttastjóra félagsins og fá nánari upplýsingar s: 525-8702. Minni á að ef viðkomandi staðfestir ekki á tímabilinu 1.-15. október þá kemur greiðsluseðill fyrir upphæðinni á viðkomandi fjölskyldu.

Foreldrafundurinn 22. september

Á fundinum sem fram fór þann 22. september fór formaður deildarinnar Samúel Guðmundsson yfir starfsemi deildarinnar, m.a. ýmsa þætti yfir áherslur barna- og unglingaráðs.
Helstu áherslur eru:
- Efla þjálfun
- Stuðla að virku foreldrastarfi
- Hlúa að afreksfólki
- Auka upplýsingaflæði til foreldra

Ívar Ásgrímsson yfirþjálfari yngri flokkanna fór yfir sitt hlutverk og hvernig aðkoma hans að öðrum flokkum er. M.a.:
- Fyrirkomulag styrktarþjálfunar
- Einstaklingsæfingar sem verða 1x í viku, einkaþjálfun í körfubolta

Ég fór síðan yfir markmið og áherslur er lúta ð 7. flokki drengja, m.a.
- Að vera meðal fjögurra bestu á liða landsins í þessum flokki
- Að allir verði með góðan alhliða grunn í körfubolta
- Að hafa félagslega skemmtun nokkrum sinnum yfir veturinn
- Að æfingar verði skemmtilegar með áherslu á læra grunnatriði körfuboltans

Æfingaleikurinn við Stjörnuna í gær

Í gær spiluðum við æfingaleik við Stjöruna í Garðabæ. Við mættum með 12 manna lið, þar sem spilatíma var skipt nokkuð jafnt á milli allra leikmanna. Leikurinn endaði með sigri Stjörnumanna og nokkuð greinilegt að þeir eru komnir lengra í sínum undirbúningi fyrir veturinn. Okkar strákar eiga margt eftir ólært sem unnið hefur verið að á síðustu æfingum og verður gert áfram á komandi æfingum. Strákarnir eru þó áhugasamir og ég veit að þeir eiga eftir að ná tökum á því sem við erum að byggja upp og standa sig vel í vetur.

Foreldrafundur miðvikudaginn 22. september kl. 20:30

Haldinn verður foreldrafundur miðvikudaginn 22. september kl. 20:30, foreldrar eru hvattir til að mæta. Starfssemi deildarinnar verður kynnt, ásamt því að farið verður yfir fyrirkomulag vetrarins í 7. flokki drengja.

Æfingaleikur 19. september

Þann 19. september förum við í heimsókn til Stjörnurnar og spilum við þá æfingaleik. Leikurinn hefst kl. 16, þannig að það þarf að mæta tímanlega og vera klæddur tilbúinn að hita upp kl. 16. Allir sem æfa taka þátt í leiknum. Æfingin sem er skv. töflu kl. 17 á sunnudögum fellur því niður þann 19. september vegna æfingaleiksins.

Fyrsta vikan liðin

Nú er fyrsta vikan liðin og 4 æfingar búnar. Á þessar æfingar hafa 12 strákar mætt og margir þeirra með 100% mætingu enn sem komið er.

Áherslan fyrstu vikuna hefur verið lögð á knattrak og má merkja strax framfarir í þeim æfingum sem lagðar hafa verið fyrir. Strákarnir hafa verið duglegir og lagt sig fram við æfingarnar.

Í næstu viku verða fáir á æfingunum, þar sem Hvaleyrarskóli er að fara í bekkjarferð, en helmingur þeirra drengja sem eru í 7. flokki fara í þessa ferð, alls 6 strákar.

Næstu 2 vikurnar verður lögð áhersla á skottækni og sóknarleik, ásamt því að stillt verður upp ýmsum leikjum er lúta að þessum atriðum.

Minni á blöðin sem dreift var á fyrstu æfingunum, ég á eftir að fá mörg þeirra til baka.