Jólafrí og næstu æfingar

Næstu æfingar verða:
miðvikudaginn 28. desember. kl. 20-22 Bjarkarhús
föstudaginn 30. desember kl. 15:30 Bjarkarhús

Æfingar á nýju ári hefjast svo 4. janúar skv. töflu.

Mæting á æfingar

Alls hafa verið 59 æfingar verið haldnar frá því að æfingar hófust í haust, 4 æfingum hefur verið stýrt af öðrum en mér.  Þær æfingar sem ég hef stýrt, þar hef ég haldið utan um mætingar, þannig að í tölunum hér fyrir neðan kemur fram mætingin á þær 55 æfingar sem ég hef stýrt.  Af þessum 55 æfingum höfum við náð 15 æfingum þar sem 10 strákar eða fleiri hafa mætt.

Breyttur æfingatíma sunnudaginn 18. des

Æfingin á sunnudaginn verður kl. 16:30 - 18:00, en um kvöldið fer fram viðureign Hauka og ÍR í Icelandexpress deild karla.

Opnar æfingar 21. og 22. desember (Uppfært)

Það verða opnar æfingar fyrir alla á aldrinum 11-16 ára hjá Haukum miðvikudaginn 21. desember og fimmtudaginn 22. desember kl. 9-12 báða dagana á Ásvöllum.  Það kostar ekkert á þessar æfingar og vil ég hvetja drengina í 8. flokki drengja að nýta sér þetta tækifæri.

Foreldra- og fjölskylduæfing þriðjudaginn 13. desember

Það verður foreldra- og fjölskylduæfing þriðjudaginn 13. desember, ég vil hvetja foreldra og systkini að mæta.  Farið verður í létta skotleiki og spilaður leikur á milli drengjanna og annarra fjölskyldumeðlima.

Æfingaleikurinn á móti Grindavík

Á mánudaginn 5. desember mættu 7 galvaskir drengir í Grindavík til að spila æfingaleik.  Þessir 7 drengir voru Anton, Eiður, Kári, Jökull, Magni, Siggi og Yngvi Óskars.  Grindvíkingar hafa á nokkuð sterku liði að skipa, sem hefur staðið sig vel í fyrstu 2 helgum íslandsmótsins, en þar hafa þeir endað í öðru og þriðja sæti í A-riðli.

Leikurinn á móti Grindavík fór ekki sérstaklega vel af stað hjá okkur og Grindavík náði góðu forskoti, komst m.a. í 14-2.  Sóknarleikurinn í fyrsta leikhluta var stirður, sem og að vítanýtingin var slök, en fyrstu 6 vítin sem við fengum fóru forgörðum.  Vörnin var þó góð og við náðum aðeins að saxa niður muninn áður en leikhlutinn var allur.  Í öðrum leikhluta var sóknarleikurinn mun betri, við hlupum kerfið mjög vel og fengum auðveldar körfur eftir það.  Baráttan í fráköstunum var með eindæmum góð, sem skilaði okkur mörgum aukaskotum og munurinn á milli liðanna minnkaði jafnt og þétt.  Í þriðja leikhluta héldum við þessum góða leik áfram og þegar að um 5 mínútur voru eftir þá leiddum við leikinn með 5 stigum.  Grindavík átti þó lokaorðið og settu niður nokkrar stórar körfur og unnu leikinn að lokum með 4 stiga mun.

Ég vil hrósa strákunum fyrir hvernig þeir spiluðu þennan leik.  Það lögðu sig allir vel fram og börðust eins og ljón.  Við sóttum mörg sóknarfráköst sem skiluðu okkur mörgum stigum.  Varnarleikurinn var góður allan leikinn.  Sóknin gekk vel að fyrsta leikhluta undanskildum, þar sem að leikkerfið skilaði mörgum körfum, sem og þegar að við komum boltanum inn í á stóru mennina og hlaupum í gegn til að fá sendingu.

Breyttur æfingatími sunnudaginn 4. desember

Æfingin á sunnudaginn 4. desember verður kl. 10:15-11:15 á Ásvöllum.

Söludagur Errea

Fimmtudaginn 1.des. verður söludagur Errea frá kl. 17:00-19:00 hér í Shenkerhöllinni (Ásvöllum).

Æfingaleikur frestast um viku

Æfingaleikurinn sem vera átti á morgun frestast um eina viku, þar sem að æfingatíminn hjá 8. flokki Grindavíkur fellur niður vegna leiks Grindavíkur og Hauka í deildarbikarnum.

Æfingaleikur við Grindavík 28. nóvember

Við munum spila æfingaleik við Grindavík þann 28. nóvember.  Leikurinn verður í Grindavík á æfingatíma þeirra, sem er frá kl. 18:20 - 19:30.  Það er mæting á Ásvelli kl. 17:30, mig vantar a.m.k. 3 foreldra til að keyra.  Bensínkostnaður á hvern dreng verður 500 kr. og greiðist bílstjórum beint.

Haukar - Tindastóll í kvöld

Það er stórleikur hjá meistaraflokki Hauka í kvöld.  Hvet alla strákana til að mæta, http://haukar.is/images/leikjaauglysingar/h-tindastoll.jpg

Afmælisjólabingó

Afmælisjólabingó og fjölskyldkaffi sunnudaginn 20 nóvember kl. 13:30 í veislusalnum á ásvöllum

Nú bjóðum við alla stórfjölskylduna velkomna í sunnudagskaffi og bingó. Fjöldi stórglæsilegra vinninga fyrir alla fjölskylduna.   Meðal vinninga er gjafabréf á  Hótel Hvolsvöll, Gjafbréf í Go kart, Sælgætiskröfur frá Góu, Bensínúttekt frá Olís, Gjafbréf frá Carita snyrtingu, Jólahlaðborð á Fjörukránni, Gjafabréf frá Hress, vinningar frá Fjölsport, Gjafabúðinni Glugganum,  Hjólaspretti, út að borða frá fjölda veitingastaða og margt margt fleira

Spjaldið kostar 500 kr. og hægt er að fá 4 spjöld á 1.500 kr.

Allir velkomnir á meðan húsrúm leyfir

Breyttur æfingatími næstu helgi

Það verður engin æfing næsta sunnudag (20. nóv), en í staðinn verður æfing kl. 16-17 á laugardag (19.nóv) í Hraunvallaskóla.

Íslandsmótið á Akureyri 12.-13. nóvember

Það voru galvaskir drengir mættir 7:15 á laugardagsmorgni á Ásvelli til að fara að keppa á Akureyri.  Ferðin norður gekk vel og vorum við mættir rúmum klukkutíma fyrir fyrsta leik.

Fyrsti leikurinn var á móti heimamönnum frá Akureyri.  Drengirnir okkar byrjuðu leikinn vel og leiddu eftir fyrsta fjórðung 12-6, áfram jókst munurinn og í hálfleik var staðan 20-11.  Strákarnir voru að spila vel, bæði í vörn og sókn.  Áfram héldum við góðum leik og má segja að úrslitin hafi verið ráðin eftir þrjá leikhluta, en þá var munurinn kominn upp í 19 stig eða 36-17.  Við slökuðum helst til mikið á í fjórða leikhluta, en engu að síður öruggur 16 stiga sigur eða 41-25.  Stigaskorið var eftirfarandi: Anton 17 (1/1 í vítum), Kári 7 (1/2 í vítum), Logi 6, Daði 5, Magni, 2, Gulli 2 og Eiður 2.  Það fengu allir 13 strákarnir að spila í þessum leik.  Vítin voru ekki mörg í þessum leik, en vel nýtt 2 af 3 ofan í eða 67%.

Næsti leikur var á móti Sindra sem mættu grimmir til leiks og gerðu okkur erfitt fyrir.  Sindramenn leiddu eftir fyrsta fjórðung 7-11 og juku muninn í þeim næsta og hálfleikstölurnar voru 11-19, lítð að ganga upp í okkar sóknarleik.  Áfram var sóknarleikurinn stirður og okkur gekk illa að vinna upp forskot þeirra, en staðan að þriðja leikhluta loknum var 21-28.  Í fjórða leikhluta náðum við hins vegar að sýna betri leik og skoruðum fyrstu 7 stig leikhlutans og jöfnuðum leikinn 28-28 og aftur var jafnt 34-34.  En lengra komumst við ekki Sindramenn áttu síðustu körfuna og unnu leikinn 34-36.  Stigaskorið var eftirfarandi:  Yngvi Óskars 7 (1/2 í vítum), Logi 7 (3/4 í vítum), Daði 5, Magni 4, Kári 4 (1/4 í vítum), Bjarki 2, Eiður 2, Jökull 2 og Anton 2 (0/4 í vítum).  Vítanýtingin var okkur dýrkeypt í þessum leik, en það fóru eingöngu 5 af 14 ofan í eða 36%.

Fyrri leikur sunnudagsins var á móti Val.  Sóknaleikurinn var stirður í fyrsta leikhluta og okkur gekk illa að koma boltanum ofan í körfuna.  Valur leiddi með 6 stiga mun eða 4-10.  Allt annað var að sjá leik okkar í öðrum leikhluta og við náðum að komast yfir og leiða með 1 stigi í hálfleik eða 14-13.  Seinni hálfleikur var mun betri í þriðja leikhluta náðum við að auka muninn í 5 stig eða 22-17.  Sigurinn var síðan aldrei í hættu í fjórða leikhluta og endaði leikurinn 35-25.  Stigaskorið var eftirfarandi:  Kári 13 (1/4 í vítum), Daði 4 (1/2 í vítum), Anton 4 (0/2 í vítum), Eiður 2, Jökull 2, Gulli 2, Logi 2 og Magni 2.  Vítanýtingin var 2 af 8 eða 25%.

Þegar hér var komið við sögu var ljóst að sigurvegarinn úr síðasta leiknum myndi vinna riðilinn og koma sér upp um riðil.  Nú var komið að því að mæta sameiginlegu liði Skallagríms og Reykdæla, sem spila undir merkjum þess síðar nefnda.  Leikurinn var jafn í fyrsta leikhluta, og nánast jafnt á öllum tölum, leikhlutinn endaði 9-10 andstæðingunum í vil.  Í öðrum leikhluta komust við yfir 11-10, en eftir það hrökk allt í baklás. Reykdælir gengu á lagið og skoruðu næstu 10 stigin og leiddu því í hálfleik  11-20.  Áfram héldu Reykdælir að bæta við forskotið í upphafi þriðja leikhluta og komust í 12-24.  Þá kom ágætur kafli hjá okkur, þar sem við skoruðum 7 stig á móti 2 og leikhlutinn endaði 19-26, 7 stiga munur.  Í fjórða leikhluta náðum við að minnka muninn í 6 stig en nær komust við ekki.  Reykdælir skoruðu síðustu 6 stig leiksins og unnu leikinn 22-34.  Stigaskorið var eftirfarandi: Yngvi Óskars 8, Daði 5 (0/4 í vítum), Logi 3 (1/4 í vítum), Anton 2 (2/4 í vítum), Kári 2 og Bjarki 2.  Vítanýtingin var ekki góð eða 3 ofaní af 12 eða 25%.

Heildarstigaskorið er því eftirfarandi:
Anton 25 (3/11 í vítum, 27%)
Kári 25 (3/10 í vítum 30%)
Daði 19 (1/6 í vítum 17%)
Yngvi Óskars (1/2 í vítum 50%)
Logi 18 (4/8 í vítum 50%)
Magni 8
Eiður 6
Bjarki 4
Jökull 4
Guðlaugur 4

Á heildina litið voru strákarnir að standa sig vel varnarlega, enda erum við ekki að fá okkur nema mest 36 stig í leik.  Sóknarleikurinn hefur hins vegar oft verið betri og færin sem við fengum vorum við ekki að nýta vel.  Heildarvítanýtingin var einnig slök eða 12 ofan í af 37 eða 32%.  Áherslur næstu vikurnar eru því augljósar, sóknarleikur, víti og skot eru hlutir sem við þurfum að leggja rækt við.

Akureyri 12.-13. nóvember

Mæting er á Ásvöllum kl. 7:15 á laugardaginn 12. nóvember, lagt af stað ekki seinna en 7:30, fyrsti leikur er kl. 14:00.

Ferðakostnaður er 6.500 (bílaleigubíll, gisting og pizzur (og drykkir) á laugardagskvöld).  Ég geri ráð fyrir að allir 14 strákarnir sem hafa verið að mæta undanfarið fari með, ef það eru einhver forföll þá hefur það áhrif á kostnaðinn.  Þessir 14 eru: Anton, Bjarki, Daði, Eiður, Ernir, Guðlaugur, Kári, Jökull, Logi, Magni, Pétur, Siggi, Yngvi Óskars og Yngvi Óðins.  Ef það eru einhver forföll, þá þarf ég að fá að vita það sem fyrst.

Farið verður á 15 manna bílaleigubíl og einnig mun Ketill (pabbi hans Kára) fara á bíl.

Strákarnir þurfa að nesta sig upp með hollu fæði fyrir hinar máltíðir helgarinnar, ætla að taka með 2 samlokugrill sem þeir geta notað.  Við höfum EKKI aðgang kæli, örbylgjuofni eða einhverju slíku.

Innangengt er úr skólanum í íþróttasalinn, þannig að þægilegt er að hafa aðsetur í stofunni okkar á milli leikja.

Taka með:

• Keppnisbúning (rauðar stuttbuxur og bol) (ATH ég mæti líka með búninga)
• Íþróttasokka fyrir báða dagana
• Körfuboltaskó
• Vatnsbrúsa
• 6.500 kr.
• Handklæði
• Tannbursta+tannkrem
• Svefnpoka/sæng+kodda
• Dýnu
• Spil, bók eða annað afþreyingarefni
• Holt nesti fyrir hádegismat, síðdegishressingu á laugardeginum + morgunmat og hádegismat á sunnudegi (t.d. skyr, jógúrt, samlokur, svala, safar, ávextir). Sælgæti er ekki í boði.

Litla Björk

Þriðjudaginn 8. nóvember verður haldin haustskemmtun 8. flokks. Ákveðið hefur verið að taka litlu björk á leigu. Tíminn okkar í litlu björk er frá 20:30-21:30, kostnaður á hvern dreng eru 1.000 kr.

Æfingaleikurinn við Grindavík fellur niður

Æfingaleikurinn sem átti að vera nk. mánudag fellur niður, vegna leikhúsferðar fermingarbarna í Grindavík.

Frítt á leikinn föstudagskvöld

Það verður frítt á leikinn hjá meistarflokki karla, Haukar - Fjölnir.  Leikurinn verður á morgun föstudag kl. 19:15.

Æfingaleikur við Grindavík 7. nóvember

Við munum spila æfingaleik við Grindavík þann 7. nóvember.  Leikurinn verður í Grindavík á æfingatíma þeirra, sem er frá kl. 18:20 - 19:30.  Það er mæting á Ásvelli kl. 17:30, mig vantar a.m.k. 2 foreldra til að keyra.  Bensínkostnaður á hvern dreng verður 500 kr. og greiðist bílstjórum beint.

Æfingaleikurinn við KR

Í gærkvöldi spiluðum við æfingaleik á móti KR, sem hefur á að skipa einu sterkasta liði landsins í þessum árgangi.  Glögglega mátti sjá að KR-ingar standa okkur framar í getu inná körfuboltavellinum.  En okkar strákar sýndu ágæta takta á köflum og stóðu vel í þeim.  Gaman var að sjá að allir lögðu sig fram við að gera sitt besta og höfðu gaman að því að spila, þó svo að vera nokkuð undir í leiknum.  Það voru mættir 12 Haukastrákar að spila leikinn og spilatímanum var skipt nokkuð jafnt á milli allra leikmanna.  Held því að vel hafi tekist til og drengirnir okkar geta með eljusemi og vinnu, náð enn lengra og veitt bestu liðunum harða samkeppni.

Breytingar á æfingatöflu

Frá og með deginum í dag tekur gildi breyting á æfingatöflunni.  Breytingin er sú að mánudagsæfingin dettur út og í staðinn kemur æfing á þriðjudögum kl. 18-19 í Hraunvallaskóla.

Ástæðan fyrir þessari breytingu er að koma til móts við þann hóp sem æfir bæði körfubolta og fótbolta.  Samhliða þessu verður föstudagsfótboltaæfingin hjá ´98 strákunum færð til kl. 17.  Það verður því ekkert mál fyrir fótboltastrákana að hætta korter fyrr til að geta náð báðum æfingunum.  Geri líka ráð fyrir því að þeir séu velkomnir á fótboltaæfinguna korter eftir að hún byrjar, Freyr veit af þessum hópi sem æfir líka körfubolta.

Leik Hauka og KFÍ frestað

Leik Hauka og KFÍ sem fara átti fram í kvöld, hefur verið frestað til morguns.  Leikurinn fer því fram kl. 20 á morgun, mánudag.

Æfingaleikur

Á æfingunni miðvikudaginn 2. nóvember koma KR-ingar í heimsókn og spila við okkur æfingaleik.

Íslandsmótið 12-13 nóvember

Nú liggur fyrir að Íslandsmótið 12-13 nóvember verður haldið í Síðuskóla á Akureyri. Leikjadagskráin er eftirfarandi:

Lau kl. 14 Haukar - Þór

Lau kl. 17 Haukar - Sindri

Sun kl. 13 Haukar - Valur

Sun kl. 15 Haukar - Reykdælir

Aukaæfing á laugardaginn í stað sunnudags.

Æfing á sunnudag 30.okt. fellur niður vegna leiks Hauka B - Keflavík B kl. 17:00 og leiks mfl kk Haukar-KFÍ kl. 19:15. Í staðinn fyrir æfinguna á sunnudaginn höfum við fengið aukaæfingu í Hraunvallaskóla á laugardaginn 29. okt. kl. 16-17. Emil Barja leikmaður mfl. karla mun stjórna þessari æfingu.

Æskilegt er að strákarnir mæti á leikinn kl. 19:15 á sunnudaginn, að horfa á leiki hjálpar mikið til við leikskilning þeirra.

Breyttur æfingatími í þessari viku

Það er æfing í kvöld (miðvikudag) á venjulegum tíma, eða 20-22. Síðan verður æfing á morgun í Bjarkarhúsinu kl. 15-16, í staðinn fyrir föstudagsæfinguna. Æfingin á sunnudaginn fellur síðan niður vegna fjölliðamóts á Ásvöllum.

Minni síðan á leikinn hjá meistarflokki karla á föstudaginn kl. 19:15. En ég vil gjarnan að strákarnir mæti á þessa leiki, það er mikilvægt fyrir þá hvað varðar leikskilning, skipulag í sóknarleik o.fl.

Körfuknattleiksbúningar - söludagur 20. október kl. 17-19

Körfuknattleiksdeild Hauka hefur gert samning við Errea varðand búninga fyrir næstu þrjú árin. Fimmtudaginn 20.okt. ætlum við að vera með söludag frá kl. 17:00-19:00 hér á Ásvöllum. Númerin sem iðkendur hafa valið sér mega þau halda en einnig er hægt að velja sér nýtt númer. Reglurnar eru þær að þeir sem eru fæddir á oddatölu ári velja sér oddatölu og þeir sem eru á sléttutölu ári velja sér slétta tölu. Nauðsynlegt er að láta skrifa niður númerið svo hægt sé að fylgjast með hver á hvaða númer því það geta ekki verið tveir með sama númer innan hvers flokks.
Nánari upplýsingar hjá íþróttastjóra

Æfingin í dag 17. október

Ívar Ásgrímsson mun stýra æfingunni í dag í fjarveru minni, er á námskeiði.

Uppgjör helgarinnar

Fyrsta fjölliðamót vetrarins fór fram í Stykkishólmi um helgina. Hópurinn mætti kl. 9 á laugardagsmorgni til að keyra í Hólminn.

Fyrsti leikurinn var síðan gegn grönnum okkar úr Garðabæ. Leikurinn fór vel af stað og skoruðum við fyrstu 6 stig leiksins og leiddum 6-3 eftir fyrsta leikhluta. Í öðrum leikhluta var vörnin áfram góð, en við misstækir í sókninni og Stjarnan leiddi 6-10 í hálfleik. Stjörnunni óx ásmegin þegar leið á leikinn og okkar menn ekki að finna sig, en staðan eftir þriðja leikhluta var 12-24. Stjarnan hélt svo þessum mun allt til leiksloka, en lokatölur urðu 26-39 Það var þó jákvætt í þessum leik að við vorum duglegir að sækja á körfuna og komumst mikið á vítalínuna. Nýtingin þar hefði þótt vera betri, en alls misfórust 17 vítaskot, en einungis 6 af 23 rötuðu rétta leið eða 26%. Stigaskorið var eftirfarandi: Hilmar 9, Gulli, 5, Magni, 5, Logi 3, Siggi, 2 og Anton 2.

Seinni leikur laugardagsins var á móti KRb. Okkur gekk nokkuð erfiðlega að koma boltanum í körfuna, þrátt fyrir góð færi nálægt körfunni. KRb náði að ganga aðeins á lagið og leiddi eftir fyrsta leikhluta 4-10. Annar leikhluti var mun betri, vörnin small saman og okkur fór að ganga betur í sókninni og komumst yfir 14-13. Seinn hálfleikur var hnífjafn á nánast öllum tölum, KRb leiddi með einu stigi fyrir lokaleikhlutann og það venjulegum leiktíma lauk var stðan 30-30 og framlengingu þurfti til. Hún var eins og leikurinn sjálfur, jafnt á öllum tölum, sem endaði síðan með flautukörfu þeirra KRinga og lokatölur leiksins því 36-38. Strákarnir eiga þó hrós skilið fyrir baráttuna og allir lögðu sig fram. En við vorum óheppnir undir körfu andstæðingana og mörg auðveld skot fóru forgörðum. Einnig töpuðust mörg auðveld stig á vítalínunni, en nýtingin þar var 2 ofaní af 13 eða 15%. Stigaskor liðsins var eftirfarandi: Siggi 17, Anton 8, Logi 4, Magni 3, Yngvi 2 og Kári 2.

Fyrsti leikur sunnudagsins var á móti heimamönnum. Nokkurt jafnræði var með liðunum í fyrsta leikhluta og vörn beggja liða í fyrirrúmi, lokatölur leikhlutans voru 4-4. Við fórum mjög vel af stað í öðrum leikhluta og breyttum stöðunni í 12-4, en Snæfell átti síðustu 5 stig leikhlutans og hálfleikstölur því 12-9. Áfram var vörnin sterk í þriðja leikhluta og sóknin frekar stirð og þegar að þriðja leikhluta lauk var staðan 14-15. Í fjórða leikhluta skorum við fyrstu körfuna og komumst yfir, en síðan komu 6 stig í röð frá Snæfelli. Þann mun náðum við ekki að brúa og lauk leiknum því 22-26. Vert er að hrósa strákunum fyrir frábæran varnarleik og baráttu, en ekkert lið náði að halda Snæfellingum í 26 stigum, en lið þeirra er vel frambærilegt. Sóknin var hins vegar ekki upp á það besta hjá okkur, sem varð okkur að falli í þessum leik. Í þessum leik komumst við minna á vítalínuna, en nýttum 2 af 8 skotum, eða 25%. Stigaskorið var eftirfarandi: Anton 12, Siggi 4, Gulli 2, Bjarki 2, Kári 1 og Magni 1.

Lokaleikur mótsins var á móti Fjölni og þar sýndu strákarnir okkar sínar bestu hliðar og sýndu vel hversu megnugir þeir geta verið. Áfram var vörnin góð, eins og í öðrum leikjum mótsins, en núna datt sóknin í gang líka. Leikurinn var jafn í fyrsta leikhluta sem endaði 14-13. Minna var skorað í öðrum leikhluta og hálfleikstölurnar voru 17-18 Fjölni í vil. Í þriðja leikhluta sýndum við einfaldlega meiri vilja til að vinna leikinn og menn lögðu sig virkilega fram og spiluðu að skynsemi. Lokatölur þriðja leikhluta voru 34-26. Áfram héldu okkar strákar að bæta í allt til leiksloka og unnu að lokum sanngjarnan sigur 50-37. Þrátt fyrir skynsaman sóknarleik og mikið af skotum af stuttu færi, þá fengum við bara 2 vítaskot sem bæði skiluðu sér ofaní, eða 100% nýting. Stigaskorið var eftirfarandi Siggi 22, Anton 10, Logi 10, Bjarki 2, Yngvi 2 og Jökull 2.

Helgin tókst í alla staði vel, þó svo að við hefðum vonast eftir betri úrslitum. Drengirnir voru sér til sóma innan sem utan vallar og komu fram sem flottur hópur.

Okkar hlutskipti verður líklega að spila í C-riðli í næsta fjölliðamóti, þar sem sigurinn á móti Fjölni dugði ekki til að bjarga sæti okkar í B-riðlinum. Öll liðin voru mjög jöfn að getu og með einum sigri í viðbót hefði hlutskipti okkar verið að spila í A-riðli í næsta móti. En það fellur í hlut Stjörnurnar.

Okkar verkefni næstu vikurnar er að koma betra skipulagi á sóknarleikinn og fara almennt yfir leikskilning, þ.e. staðsetningar og ákvarðanir leikmanna í sókninni. Að sjálfsögðu er stefnan sett á að koma okkur aftur upp í B-riðil eftir næsta mót.

Tilkynning frá Íþróttastjóra

Kæru forráðamenn
Á morgun laugardag lokar íbúagáttin á miðnætti.
Einnig vil ég minna þá á sem ekki hafa greitt æfingagjöldin að ganga frá því sem fyrst.
Ef ekki er búið að ganga frá greiðslu þá getum við ekki endurgreitt úr íbúagáttinni.
Ef ykkur vantar aðstoð við að ganga frá gjaldinu þá endilega hafið samband á gudbjorg@haukar.is eða í síma 525-8702.

Stykkishólmur 15.-16. október

Mæting er á Ásvöllum kl. 9 á laugardaginn 15. október, lagt af stað ekki seinna en 9:15, fyrsti leikur er kl. 13:00.

Ferðakostnaður er 3.200 (þ.e. 2.000 bensín, 500 gisting, 700 í sund + pylsur & meðlæti laugardagskvöld).

Strákarnir þurfa að nesta sig upp með hollu fæði fyrir hinar máltíðir helgarinnar, ætla að taka með samlokugrill sem þeir geta notað einnig höfum við afnot af ísskáp í skólanum (muna að merkja vel það sem á að fara í kælinn, því það verða 3 önnur lið að gista í skólanum líka).

Taka með:

• Keppnisbúning (rauðar stuttbuxur og bol)
• Íþróttasokka fyrir báða dagana
• Körfuboltaskó
• Vatnsbrúsa
• 3.200 kr.
• Sundföt
• Handklæði
• Tannbursta+tannkrem
• Svefnpoka/sæng+kodda
• Dýnu
• Spil, bók eða annað afþreyingarefni
• Holt nesti fyrir hádegismat, síðdegishressingu á laugardeginum + morgunmat og hádegismat á sunnudegi (t.d. skyr, jógúrt, samlokur, svala, safar, ávextir) Sælgæti er ekki í boði en það má koma með 1 gosdrykk fyrir laugardagskvöldið.

Errea söludagar Hauka

Nú er komið að söludögum Hauka á Errea keppnisbúningi fyrir Körfuknattleiksdeild Hauka. Gerður var þriggja ára samningur við Errea í haust og er nú komið að því að yngri flokkar körfuknattleiksdeildar fái að kaupa búninga.

Söludagur verður á Ásvöllum:
Fimmtudaginn 6. október kl. 17:00-19:00

Verð á íþróttafatnaði: Börn Fullorðnir Körfuknattleiksbúningur (buxur og treyja) 8.990 9.490 (með merkingum, Haukamerki, númer og logo)

Foreldrar/forráðamenn mæta á Ásvelli, panta það sem vantar og greiða við pöntun. Tekið er við peningum, debetkortum og kreditkortum.

Foreldrar/forráðamenn fá fatnaðinn afhendan á Ásvöllum, afhendingarferlið tekur 2 vikur. Þeir sem vilja geta sett nafn barnsins aftan á búninginn og/eða á annan íþróttafatnað en það mun vera á eigin kostnað.

Íslandsmótið, 15-16 október

Fyrsta umferð íslandsmótsins fer fram helgina 15.-16. október í Stykkishólmi. Leikjadagskráin er eftirfarandi:

Lau kl. 13 Stjarnan

Lau kl. 15 KR-b

Sun kl. 10 Snæfell

Sun kl. 13 Fjölnir

Nánar um ferðatilhögun síðar.

Leikreglur 8. flokks, tekið af vef kki.is

Aldur: 13 ára eða 8. bekkur grunnskólans
Leiktími: 4 x 8 mínútur, hálfleikur skal vera 5 mínutur og hlé milli 1. og 2. leikhluta sem og milli 3. og 4. leikhluta skal vera 1 mínúta. Í fyrri hálfleik er leikklukkan ekki stöðvuð. Ekki er heimilt að taka leikhlé í fyrri hálfleik og engar innáskiptingar leyfðar. Eitt leikhlé er á hvort lið er leyft í seinni hálfleik. Að öðru leyti skal leikið eftir leikreglum FIBA hverju sinni.

Í 8. flokki karla er einungis heimilt að leika maður á mann vörn, en á eigin sóknarhelmingi má leika hvaða vörn sem er. Verði lið uppvíst að því að spila ólöglega vörn skal stöðva leikinn og aðvara þjálfara brotlega liðsins. Við endurtekin brot skal dæma tæknivillu (B) á þjálfara brotlega liðsins.

Ef lið notar 10 leikmenn í 8. aldursflokki í fyrri hálfleik fær það bónusstig. Þannig fær lið 3 stig fyrir sigur og 1 stig fyrir tap.

Leika skal með bolta nr. 6, (kvennabolta) á stórar körfur.

Það lið er Íslandsmeistari sem flest stig hlýtur í A-riðli í síðustu umferð.

Æfingin í dag féll niður

Æfingin sem vera átti í dag féll niður vegna sjónvarpsleiks. Því miður hafði ég ekki þessar upplýsingar og fór því fýluferð á Ásvelli ásamt nokkrum drengjanna.

Íbúagáttin opin 1.-15. október

Kæru forráðamenn

Í gær 1.október opnaði íbúagátt Hafnarfjarðarbæjar og er opin til 15. október.

Til þess að fá niðurgreiðsluna endurgreidda þá þurfið þið að fara þarna inn og merkja við ykkar félag og grein.

Minni á að hver iðkandi getur fengið endurgreiðslu fyrir tvær greinar.

Einnig langar okkur að minna ykkur á að ganga frá skráningu og greiðslu æfingagjalda en frestur til þess er fram yfir helgi.

Með íþróttakveðju, íþróttastjóri

Æfingin 30. september

Ingvar Guðjónsson mun sjá um æfinguna nk. föstudag í fjarveru minni.

Æfingin í dag fellur niður

Æfingin í dag 25. september fellur niður vegna uppskeruhátíðar í fótboltanum.

Kæru forráðamenn

Ég vil byrja á því að þakka þeim sem eru búnir að skrá sig og ganga frá gjöldum. Þetta er mikilvægt fyrir starfið okkar og ykkar. Þá vil ég hvetja þá sem ekki eru búnir að ganga frá gjöldum að gera það sem fyrst. Frestur til að ganga frá greiðslu gjalda er 1. okt.

Við erum að taka í gagnið nýtt skráningarkerfi sem hjálpar okkur að halda utan um allar skráningar og greiðslu gjalda þannig að öll skráning/greiðsla gjalda fer í gegnum haukar.is.
Þeir sem notuðu kerfið í sumar þegar þeir skráðu í íþróttaskóla Hauka þurfa ekki að skrá aftur inn iðkendur heldur fara inn á því lykilorði sem þau bjuggu til í sumar.

1. Farið er á heimasíðunni okkar haukar.is.
2. Hægra megin á síðunni er gulur kassi sem í stendur „Skráning í vetrarstarf Hauka“.
3. Farið þar inn og byrjið á því að gera „nýskráning“.
4. Veljið ykkur lykilorð sem þið notið síðan í hvert skipti sem farið er þarna inn.
5. Skráið alla ykkar iðkendur inn með því að gera „Nýr iðkandi“ og fylla þar út upplýsingar.
6. Nú getið þið skráð í flokka og gengið frá greiðslu.

Þeir sem eru með kreditkort geta klárað skráningu/greiðslu gjalda á netinu, hinir hafa samband við íþróttastjóra og hafa tvo valmöguleika:
1. Millifæra á reikning Hauka (upplýsingar hjá íþróttastjóra).
2. Greiðsluseðill – hægt er að skipta gjaldinu hér í 6 greiðslur.

Niðurgreiðslur Hafnarfjarðarbæjar eru sem hér segir:
Fyrir 6-12 ára 1.700 á mánuði (knattspyrna fær 12 mánuði, handbolti og körfubolti 9 mánuði)
Fyrir 13-16 ára 2.550 á mánuði (þær greinar sem eru allt árið fá 12 mánuði í endurgreiðslu)
Endurgreiðslurnar verða millifærðar annaðhvort á kreditkort forráðamanna eða endurgreitt á reikning, fer eftir hvernig gjöldin eru greitt. Endurgreitt er eftir hvert tímabil þ.e. gáttin eru opin frá 1.-15.okt, 1.-15.feb. og 1.-15.júlí – eftir hvert tímabil göngum við frá endurgreiðslu.

Frestur til að skrá og ganga frá greiðslu gjalda er 1. okt.

Allar upplýsingar varðandi æfingagjöld og niðurgreiðslu er á haukar.is undir „Æfingagjöld“, hægra megin á síðunni. Æfingagjöld eru heildargreiðslur þ.e. forráðamenn eiga eftir að fá niðurgreitt sem þeir fá eftir hvert tímabil.

Með Haukakveðju,

Guðbjörg Norðfjörð

Íþróttastjóri Hauka
gudbjorg@haukar.is
s: 525-8702

Kæru Haukafélagar

Haukar munu viðhafa þá nýbreytni þetta árið að hafa opið hús þar sem forráðamönnum gefst kostur á því, meðal annars, að ganga frá greiðslu æfingagjalda í barna og unglingastarfinu.

Takið því frá föstudaginn 9. september n.k. frá kl. 17:30 til 20:30 eða laugardaginn 10.september n.k. frá kl. 10:00 til 14:00.

Á þessum dögum munum við kynna starfssemi Hauka. Við munum starfrækja sérstakt Hauka kaffihús í tilefni dagsins þar sem veitingar eru ókeypis. Ykkur er því öllum boðið í vöfflur með rjóma og kakó/kaffi.

Á sama tíma getið þið gengið frá æfingagjöldum vegna komandi starfsárs. Haukar hafa tekið í gagnið nýtt skráningarkerfi þar sem allir geta gengið frá æfingagjöldum á netinu. Kerfið var notað í rekstri sumarskólans og reyndist mjög vel, þannig að nú mun sama kerfi vera notað vegna æfingagjalda. Hægt er að ganga frá greiðslu eða greiðsludreifingu á staðnum og hvetjum við fólk til að gera það.

Á sama tíma munum við kynna samstarf N1 og Hauka varðandi bensínkort, en allir Haukar sem skrá sig í hóp 398 hjá N1 fá 5 krónu afslátt á hverjum eldsneytislítra auk þess að fá afslátt á þjónustuvörum. N1 kortið er ávísun á verulegan sparnað fyrir Haukafélaga og það kostar ekkert að fá sér kort og engar skuldbindingar um viðskipti. Menn einfaldlega nota kortið ef það er hagkvæmt fyrir viðkomandi. Á sama tíma styðjið þið við bakið á starfsemi Hauka. Við minnum einnig á N1 bensínstöðina við Ásvelli.

Haukar hafa einnig skrifað undir samstarfssamning við tryggingafélagið TM og þeir sem hafa áhuga á að fá tilboð í betri verð í tryggingum geta komið því í framkvæmd á staðnum.

Haukar í horni er félagsskapur stuðningsmanna Hauka og það eiga allir stuðningsmenn að vera í þeim ágæta félagsskap. Á opna húsinu verður kynning á þessu starfi enda er þessi stuðningur mikilvægur fyrir Hauka.

Haukar bjóða ykkur því hjartanlega velkomin á opið hús föstudaginn 9. september og laugardaginn 10. september n.k.

Við sjáum vonandi sem flesta.
Áfram Haukar

.

Foreldrafundur mánudaginn 5. september

Haldinn verður foreldrafundur mánudaginn 5. september kl. 20 á Ásvöllum, hvet alla foreldra til að mæta og kynna sér starfið sem framundan er í vetur.

Æfingar hefjast 29. ágúst

Nú styttist í að æfingar hefjist að nýju eftir sumarfrí. Fyrsta æfing vetrarins verður samkvæmt æfingatöflu mánudaginn 29. ágúst kl. 16:20-17:10 á Ásvöllum. Hlakka til að hitta ykkur aftur, dragið endilega félagana með til að prófa æfingu með okkur.

Kominir í sumarfrí

Nú er æfingum vetrarins lokið og við taka sumaræfingar og önnur ævintýri. Ég vil þakka ykkur fyrir samstarfið í vetur, sem var ánægjulegt og gott í alla staði. Verið endilega duglegir að æfa ykkur í sumar með boltann og gera styrktaræfingar.

Æfingaleikur við Stjörnuna

Við spiluðum "óvænt" æfingaleik við Stjörnuna í kvöld. Forsaga málsins er sú að ég bauð þeim í heimsókn, með því að senda tölvupóst á þjálfarann í síðustu viku. Ég fékk ekkert svar um að þeir myndu mæta, þannig að ég var búinn að afskrifa æfingaleik. En síðan birtust Stjörnumenn óvænt á æfinguna í kvöld. Við spiluðum hörkuleik á móti Stjörnustráknum og spilum vel fyrri hálfleikinn, leiddum með nokkrum stigum. En í síðari hálfleik náði Stjarnan góðum kafla og við misstum trúna á að við ættum möguleika og tapið var óþarflega stórt, eða rúm 20 stig.

Minni á síðustu æfingarnar, þ.e. á sunnudaginn kl. 17 á Ásvöllum og þriðjudaginn kl. 17 í Hraunvallaskóla.

Uppskeruhátíð fimmtudaginn 19. maí kl. 18

Sumaræfingar

Æfingabúðir kkd. Hauka sumarið 2011

Árgangar 1998, 1997 og 1996 – Drengir og stúlkur.

10 vikna körfuboltabúðir á vegum kkd. Hauka verða sumarið 2011. Tvær inniæfingar verða í hverri viku, á þriðjudögum og fimmtudögum frá kl. 16.00 – 17.30, og tvær styrktaræfingar í viku á mánudögum og fimmtudögum.

Æfingar byrja strax er skóla lýkur, mánudaginn 6 júní og standa til föstudagsins 19 ágúst. Frí verður í kringum verslunarmannahelgina, frá fimmtudeginum 28 júlí til mánudagsins 8 ágúst.

Áhersla verður á einstaklingsæfingar og einblýnt á grunnhreyfingar, svo sem fótahreyfingar, sóknarstöðu, drippl, skot og margt fleira. Iðkendum verður líka kennt betra hugarfar á æfingum og keppni og hvernig á að undirbúa sig undir æfingar og leiki og farið í næringarfræðslu.

Yfirþjálfarar verða Ívar Ásgrímsson, yfirþjálfari kkd. Hauka og Helena Sverrisdóttir atvinnumaður í körfubolta. Ívar hefur mikla reynslu sem þjálfari, hefur þjálfað bæði kvenna- og karlalið í efstu deild, A landslið kvenna og yngri landslið Íslands. Helena er ein besta körfuknattleikskona Íslands frá upphafi og hefur verið að spila með frábærum árangri með háskólaliðinu TCU í Bandaríkjunum, var í nýliðavali WNBA og er nýbúinn að skrifa undir samning við eitt besta lið Evrópu í kvennaboltanum og er það mikill fengur að fá hana til þess að kenna á þessu námskeiði. Styrktaræfingarnar mun Kristján Ómar Björnsson sjá um en hann hefur mikla reynslu og góða menntun á þessu sviði. Kristján Ómar hefur séð um styrkaræfingar hjá yngri flokkum Hauka síðasta vetur og er einnig kennari á Keili. Það er mjög mikilvægt að vinna í að auka styrk og liðleika krakka á þessum aldri og hefur Kristján Ómar gert einstaklega góða hluti með yngri flokkana og því er það mikill akkur að hafa hann á þessu námskeiði. Auk þessa verða aðrir þjálfarar úr þjálfarateymi Hauka á námskeiðinu.

Kostnaður vegna þessa námskeiðs er 15.000 kr. fyrir allar 10 vikurnar eða einungis 1.500 kr. vikuna. Auk þess þarf að skrá iðkendur á íbúagáttina fyrir 3ja tímabil ársins sem verður í byrjun júní.

Þetta er mjög metnaðarfullt verkefni hjá kkd. Hauka og ætti að gera okkar flokka enn betri í að ná þeim markmiðum sem deildin stefnir að með sína iðkendur.

Engin æfing sunnudaginn 1. maí

Æfingin á sunnudaginn 1. maí fellur niður, en húsið á Ásvöllum er lokað þennan dag. Næsta æfing verður því á þriðjudaginn 3. maí kl. 17. í Hraunvallaskóla.

Fjölskylduæfing og foreldrafundur

Á fimmtudaginn verðu foreldrafundur kl. 18:30 á Ásvöllum, á fundinum verður farið yfir skipulag sumarsins og hvaða kostir á æfingum verða í boði fyrir strákana.

Á hefðbundnum tíma eða kl. 19:30 verður fjölskyldu- og foreldraæfing. Ég vil hvetja foreldra, bræður og systur drengjanna í 7. flokki að mæta á æfinguna. Farið verður í skemmtilega skotleiki og keppni sett upp á milli foreldra og drengjanna. Mæta þarf í íþróttafatnaði og helst með innanhússkó. Vonandi að sem flestir geti mætt.

Æfingaleikur 16. apríl

Við munum heimsækja Val laugardaginn 16. apríl og spila við þá æfingaleik í Vodafone höllinni að Hlíðarenda. Þetta er liður í 100 ára afmæli Vals og munu nokkrir flokkar frá Haukum mæta þennan dag. Leikurinn hefst kl. 11, þannig að venju er mæting hálftíma fyrir leik, þ.e. vera tilbúinn þá. Ég verð fjarverandi þessa helgi og mun Óskar Freyr (Pabbi Yngva) stýra leiknum. Eftir leikinn ætlar Valur svo að bjóða í pulsur og svaladrykk fyrir alla iðkendur, þjálfara og foreldra.

Körfuboltabúðir Hauka um Páskana

Haukar standa fyrir körfuboltabúðum um páskana, eða 18.-20. apríl, frá kl. 13-16. Það þarf að tilkynna þátttöku með því að senda póst á ivar@haukar.is í síðasta lagi á föstudaginn. Þessar búðir eru fyrir 1.-7. bekk.

Kostnaður við búiðirnar eru 4.000 kr.

Afmælisdagur Hauka 12. Apríl

Afmælisdagur Hauka 12. Apríl – Haukadagur fyrir alla fjölskylduna

Þriðjudaginn 12. apríl fagnar knattspyrnufélagið Haukar 80 ára afmæli. Dagskrá verður á Ásvöllum þann dag fyrir alla fjölskylduna frá klukkan 17.00 – 22.00

Kl: 17.00 – 19.00 Barnaskemmtun - Haukafjör

Barnaskemmtun fyrir aldurshópinn 12 ára og yngri þar sem þjálfarar úr öllum deildum kenna öll trikkin – atriði úr Fúsa froskagleypir –Kiddi Óli úr Sönglist – Freyr töframaður- Dans frá Dansíþróttafélagi Hafnarfjarðar – blöðrur - kaka - fjör

Kl: 19.30 – 22.00 Afmæliskaffi og heiðursviðurkenningar

Veittar verða viðurkenningar fyrir vel unnin störf í þágu félagsins. Ungt Haukafólk spilar á hljóðfæri og dansarar frá Dansíþróttafélagi Hafnarfjarðar sýna dans. Afmæliskaka og kaffi fyrir allt Haukafólk

Kl: 20.00 – 22.00 Unglingaball í Veislusalnum Ásvöllum

Nú er komið að afmælisfjöri fyrir 7.-10. bekk DJ: Bóbó og Elín Lovísa og Kristmundur úr söngkeppni framhaldsskólanna 2010 skemmta.

Maður er manns gaman – mætum öll og fögnum 80 ára afmæli félagsins okkar

Breytingar á dagskrá næstu daga

Æfingin á fimmtudaginn 7. apríl fellur niður vegna leiks í N1 deildinni í handbolta. Æfingin á Ásvöllum á sunnudaginn fellur einnig niður vegna afmælishátíðar Hauka. Í staðinn fáum við æfingu á sunnudaginn kl. 11-12 í íþróttahúsinu á Strandgötu.

Það verður ekki hefðbundin æfing þriðjudaginn 12. apríl, þ.e. engin æfing í Hraunvallaskóla. Þennan dag sem er 80 ára afmælisdagur Hauka, verður barna- og unglingaskemmtun á Ásvöllum. Dagskráin verður auglýst síðar og ég birti hana hér á bloggsíðunni.

Æfingin á sunnudaginn 3. apríl kl. 11:30

Æfingin á sunnudaginn 3. apríl verður kl. 11:30 - 12:45, Emil Barja mun stýra æfingunni í fjarveru minni.

Afmælishlaup Hauka 9. apríl

Staður og tímasetning
Hlaupið verður haldið laugardaginn 9. apríl kl. 11:00. Hlaupið verður frá Ásvöllum heimastöðvum HAUKA í Hafnarfirði. Hlaupið er almenningshlaup, ætlað allri fjölskyldunni og hentar ungum sem öldnum.
Hlaupinn verður einn km fyrir hvern áratug sem liðinn er frá stofnun HAUKA. Hlaupið hefst árið 1931 og komið verður í mark árið 2011.

Vegalengdir

• 8 km með tímatöku.
• 3 km án tímatöku.

Leiðarlýsing
8 km hlaupið verður ræst frá Ásvöllum og hlaupið um Vallarhverfið í Hafnarfirði og til baka (nánari leiðarlýsing er væntanleg).
3 km hlauparar verða ræstir frá Ásvöllum og hlaupinn þægilegur hringur sem endar á Ásvöllum (nánari leiðarlýsing er væntanleg).

Flokkaskipting

8 km hlaup

• 14 ára og yngri
• Eldri en 14 ára

3 km hlaup
Engin flokkaskipting

Verðlaun
Allir keppendur í bæði 3 km og 8 km hlaupunum sem ljúka hlaupi fá verðlaunapening.
Verðlaun verða veitt í 8 km hlaupi fyrir fyrsta sæti karla og kvenna í báðum flokkum.

Skráning
Frítt er í hlaupið af tilefni 80 ára afmælis HAUKA
Forskráning fer fram hér á www.hlaup.is

Nánari upplýsingar
Nánari upplýsingar er hægt að fá á antonm@simnet.is
Nánari upplýsingar verða birtar á bloggsíðu Skokkhóps HAUKA þegar nær dregur og hér á hlaup.is

Íslandsmótið í Kórnum

Nú er lokið fjórðu og síðustu helginni í Íslandsmótinu. Alls spiluðu drengirnir fjóra leiki sem voru eftirfarandi:

Haukar - Fjölnir 45-35: Okkur gekk erfiðlega að finna leiðina að körfu Fjölnis til að byrja með, en vörnin var nokkuð góð. Kári opnaði setti svo fyrstu körfuna okkar, svona í tilefni 13 ára afmælisins síns, en þetta eru fyrstu stig Kára á íslandsmótinu. Fjölnir leiddi með 10 stiga mun í hálfleik eða 8-18. Í seinni hálfleiknum gekk sóknarleikurinn aðeins betur og náðum við að minnka munin í 18-22. Í þeirri stöðu hrökk þeirra besti maður í gang og setti niður þrjár 3ja stiga körfur og jók muninn í 11 stig, 20-31, sá munur hélst síðan út leikinn. Stigaskor drengjanna var eftirfarandi: Anton 10, Daði 7, Yngvi (Óskars) 6, Siggi 4, Bjarki 2, Gunnar 2, Logi 2 og Kári 2. Vítanýting liðsins var 40% eða 4/10.

Haukar - KRb: 32-34: Eins og í fyrsta leiknum þá var sóknarleikurinn ekki að ganga vel. Strákarnir voru þó duglegir og sóttu mörg sóknarfráköst, en skotin voru ekki að detta niður, staðan í hálfleik 14-16. Í seinni hálfleik vorum við ávallt skrefinu á eftir og vantaði herslumuninn til að geta jafnað og komist yfir í lok leiksins. Stigaskor drengjanna var eftirfarandi: Anton 15, Daði 7, Siggi 4, Bjarki 2, Jökull 2 og Logi 2. Vítanýting liðsins var ekki nema 26% eða 6/23, og má segja þar hafi farið dýrmæt stig sem að hefðu getað fært okkur sigur í þessum leik.

Haukar - Breiðablik 45-25: Leikurinn var jafnari en lokatölur gefa til kynna. Í hálfleik munaði 7 stigum, en fyrri hálfleikur endaði 15-22. Við hófum seinni hálfleikinn vel og minnkuðum muninn í 3 stig 19-22. En þá skildu leiðir, Breiðablik skorar næstu 8 stigin og breyta stöðunni í 19-30. Sá munur hélst síðan, þangað til leikurinn endar á því að Blikar skora síðustu 11 stig leiksins. Stigaskor drengjanna var eftirfarandi: Logi 8, Siggi 7, Daði 3, Anton 3, Yngvi (Óskars) 2 og Gulli 2. Vítanýting liðsins var 50% eða 6/12.

Haukar - Reykdælir 47-34: Í þessum leik tókum við frumkvæðið strax frá fyrstu mínútu og létum forystuna aldrei af hendi allan leikinn. Staðan í hálfleik var 20-13 og munurinn síðan smá jókst allt til loka leiksins. Stigaskor drengjanna var eftirfarandi: Anton 11, Yngvi (Óskars) 10, Logi 9, Siggi 6, Magni 4, Daði 2 og Gulli 1. Vítanýting liðsins var 57% eða 4/7.

Heildarstigaskor og vítanýting helgarinnar var eftirfarandi:
Anton 39 stig, 30% vítanýting, 6/20
Logi 21 stig, 0% vítanýting, 0/2
Siggi 21 stig, 30% vítanýting 3/10
Daði 19 stig, 83% vítanýting 10/12
Yngvi (Óskars) 18 stig, 0% vítanýting 0/2
Bjarki 8 stig, 0 % vítanýting 0/4
Magni 4 stig, ekkert víti
Gulli 3 stig, 50% vítanýting 1/2
Kári 2 stig, ekkert víti
Jökull 2 stig, ekkert víti
Gunnar 2 stig, ekkert víti.

Þó svo að Íslandsmótinu sé nú lokið, þá eru mikilvægar vikur framundan hjá strákunum. Nú er tími til að æfa vel þau atriði sem við erum veikastir fyrir í hver og einn. Þannig að þegar það kemur að næsta tímabili, þá verðum við ennþá sterkari. Það verða skipulagðar æfingar til um miðjan maí mánuð. Nú munu strákarnir einnig skipta um bolta, en á næsta tímabili spila þeir með stærri bolta og þann bolta ætlum við að byrja nota núna á æfingunum sem eru framundan.

Íslandsmót mars 2011

Nú um helgina fer fram 4. fjölliðamótið í Íslandsmóti KKÍ í Kórnum í Kópavogi.

Drengirnir þurfa að taka með sér nesti til að snæða á milli leikja, ávöxt og/eða samloku og svo vatn (eða annan drykk). Ekki er heimilt að taka með sér gosdrykki eða sælgæti.

Mæta þarf með búningana sína með sér, fyrir þá sem ekki eiga búning, þá mun ég verða með búning fyrir þá. Það eiga allir að vera tilbúnir 30 mín fyrir leik.

Sjá leikjaniðurröðun í frétt hér að neðan.

Snæfell - Haukar, sætaferðir

Á morgun miðvikudag 23. mars eru sætaferðir frá Ásvöllum á oddaleikinn milli Snæfells og Hauka. Lagt verður af stað kl. 15 frá Ásvöllum og til þess að komast í ferðina þarf að skrá sig fyrir kl. 10 í fyrramálið, með því að senda póst á netfangið baldur@hafnarfjordur.is , það kostar 1.000 kr. í rútuna. Sjá nánari upplýsingar um ferðina í Stykkishólm á heimasíðu Hauka, http://haukar.is/.

Þeir sem ætla á leikinn fá að sjálfsögðu frí á æfingunni annað kvöld. Annars verð ég með æfingu samkvæmt æfingatöflu, eða kl. 19 í Setbergsskóla fyrir þá sem ekki fara á leikinn.

Miðar á leikinn á morgun

Ég er með miða á leikinn á morgun. Hver drengur í liðinu getur fengið 2-3 miða, sem foreldrar að aðrir geta nýtt á leikinn á morgun. Strákarnir sem æfa fá frítt á leikinn og þurfa ekki miða. Miðana getið þið nálgast heima hjá mér (Hörgsholti 35).

Haukar - Snæfell

Minni á leikinn milli Hauka og Snæfells mánudaginn kl. 19:15. Ég dreifi miðum til drengjanna á æfingu á morgun.

Íslandsmótið 26.-27. mars í Kórnum

Nú er ljóst að við keppum síðasta fjölliðamótið í vetur í Kórnum í Kópavogi helgina 26.-27. mars.
Búið er að raða niður leikjunum og verða þeir eftirfarandi:

Laugardagur
kl. 11:00 Haukar - Fjölnir
kl. 13:00 Haukar - KRb

Sunnudagur
kl. 11:00 Haukar - Breiðablik
kl. 14:00 Haukar - Reykdælir
.

Breyting á æfingatíma sunnudaginn 20. mars

Æfingin á sunnudaginn 20. mars verður kl 13-14 á Ásvöllum.

Breyting á æfingatíma

Æfingin á fimmtudaginn 17. mars verður kl. 20 í Hraunvallaskóla.

Mætum á leikinn í kvöld 10.mars kl. 19:15, engin æfing

Æfingin fimmtudaginn 10. mars fellur niður vegna leiks Hauka og KFÍ í Iceland Express deild karla. Þetta er mikilvægur leikur og sæti í úrslitakeppninni er í húfi. Mætum á leikinn og hvetjum strákana til sigurs, leikurinn hefst kl. 19:15.

Leiðrétting, það er æfing á morgun 3. mars

Það verður æfing á morgun þann 3ja mars á sama tíma og venjulega. Handboltaleikurinn er á úti velli, en ekki á Ásvöllum.

Afmælisbingó og bollukaffi

Á sunnudaginn 6. mars milli 15.00 og 17.00 verður bingó og bolla á Ásvöllum og alveg tilvalið að kalla saman fjölskylduna sunnudags-bollukaffi.
Meðal vinninga er sælulykill á Hótel Örk, 20.000 kr. bensínúttekt frá ÓB, gjafakort frá Hress, Fjölsport, Partý búðinni, Go-Kart, o.fl.
Út að borða frá fjölda veitingastaða, ísveisla frá Vesturbæjarís og margt margt fleira. Allir velkomnir á meðan húsrúm leyfir.

ATH þeir drengir sem vilja fá frí á æfingu til að taka þátt í bingóinu fá frí eða geta mætt á æfingu eftir að bingói lýkur.

Breytingar á æfingum

Æfingin á fimmtudaginn 3. mars fellur niður vegna leiks í N1 deild karla í handbolta. Æfingin á sunnudaginn 6. mars byrjar kl. 16:40 og lýkur 17:40

Æfing á sunnudag 27. feb

Æfingin á sunnudaginn verður kl. 14 í Hraunvallaskóla.

Bikarhelgi á Ásvöllum

Um helgina fer fram bikarhelgi á Ásvöllum og drengirnir okkar taka að sér að vera á moppunum á leikjunum. Á þessari bikarhelgi fara fram allir bikarúrslitaleikir yngri flokka landsins, þannig að ég hvet drengina sérstaklega til að kíkja á þá. Skipulagið er eftirfarandi:

Lau kl. 10 Gulli og Pétur
Lau kl. 12 Daði og Siggi
Lau kl. 14 Daði og Siggi
Lau kl. 16 Bjarki og Anton
Lau kl. 18 Bjarki og Anton

Sun kl. 10 ?
Sun kl. 12 Magni og Gulli
Sun kl. 14 Magni og Gulli
Sun kl. 16 Magni og Gulli

Lasertag þriðjudaginn 1. mars

Strákarnir hafa valið lasertag sem félagslega skemmtun vorannarinnar. Farið verður þriðjudaginn 1. mars eftir æfingu sem lýkur kl. 18. Við þurfum að vera mættir inn í Kópavog (lasertag.is) kl. 18:45. Þar verða spilaðir 3 leikir (15 mínútur hver) og endað á pizzu og gosi. Kostnaður á hvern strák er 2.200 kr. og greiðist á staðnum. Ég þarf einnig aðstoð við að akstur á strákunum.

Íslandsmótið í Grindavík

Strákarnir stóðu sig vel seinni daginn og unnu 2 góða og örugga sigra, heildarniðurstaðan var því 2 töp og 2 sigrar. Hér að neðan verður gerð stutt grein fyrir leikjunum fjórum.

Fyrsti leikur laugardagsins var á móti KR. Leikurinn fór mjög vel af stað og leiddum við 10-3 eftir fyrsta leikhluta og 16-9 í hálfleik. Í seinni hálfleik töpuðust nokkrir boltar á upphafsmínútum og við fórum á taugum. KR-ingarnir breyttu stöðunni úr 16-9 í 22-30 í þriðja leikhluta, eða unnu leikhlutann 21-6. Þeir héldu síðan uppteknum hætti og unnu síðasta leikhlutann 25-6 og stórsigur 55-28 og niðurstaðan því 27 stiga tap, þrátt fyrir að hafa leitt með 7 stigum í hálfleik. Ljósi punkturinn í þessum leik er að Gunnar var að skora sitt fyrsta stig á Íslandsmóti, en hann hann kom inná í lok leiksins og setti niður 1 víti. Til hamingju Gunnar. Stigaskor leikmanna var eftirfarandi: Siggi 9, Yngvi 8, Daði 5, Magni 4 og Logi 2

Annar leikur laugardagsins var á móti Grindavík. Við lentum undir eftir fyrsta leikhluta, en þá leiddu Grindvíkingar 10-6. Jafnræði var með liðunum í öðrum leikhluta og staðan í hálfleik 17-12 Grindavík í vil. Okkur gekk erfiðlega að saxa á forskot Grindvíkinga og vorum 10 stigum undir þegar að þriðja leikhluta lauk, 28-18. Grindvíkingar kláruðu síðan leikinn 46-30. Stigaskor leikmanna var eftirfarandi: Siggi 12, Yngvi 5, Eiður 4, Bjarki 4, Gulli 2 og Logi 2.

Þess er vert að geta að Anton gat ekki spilað með okkur leikina á laugardeginum og var hans sárt saknað, hann kom þó aftur inn í hópinn á sunnudeginum og spilaði báða leikina.

Þriðji leikur helgarinnar var á móti Reykdælum og áttum við harma að hefna frá mótinu í Borgarnesi þegar að við töpuðum fyrir þeim þar. Leikurinn fór rólega af stað og leiddum við leikinn eftir fyrsta leikhluta 6-4. Strákarnir tóku góðan sprett í öðrum leikhluta og leiddu í hálfleik 16-8. Reykdælir tókst aldrei að ógna okkar forskoti eftir það og jukum við muninn upp í 13 stig fyrir loka leikhlutann eða 28-15. Leiknum lauk síðan með öruggum sigri okkar eða 38-21. Varnarleikur, fráköst og barátta drengjanna til mikilla fyrirmyndar, sem skóp þennan sigur. Stigaskor leikmanna var eftirfarandi: Siggi 16, Yngvi 8, Anton 6, Magni 4, Daði 3 og Eiður 1.

Lokaleikurinn var á móti FSU, en eins og á móti Reykdælum þá töpuðum við fyrir þeim í Borgarnesi. Jafnræði var með liðunum í fyrsta leikhluta og staðan að honum loknum var 9-9. Mikill kraftur kom með drengjunum sem spiluðu annan leikhluta og náðu þeir forskoti áður en flautað var til hálfleiks, 19-13. Munurinn eftir það jókst síðan jafnt og þétt, 29-19 eftir þriðja leikhluta og endaði 42-25. Stigaskor leikmanna var eftirfarandi: Daði 10, Siggi 8, Magni 6, Anton 5, Logi 4, Jökull 4, Yngvi 3 og Eiður 2.

Alls tóku 15 strákar þátt í mótinu með okkur um helgina, Yngvi Freyr Óðinsson og Kári Ketilsson voru að spila sitt fyrsta mót og óskum við þeim til hamingju með það. Það fengu allir 15 strákarnir að spreyta sig, en eins og alltaf þá fá menn að spila mis mikið. Það eru þó allir hluti af liðinu og taka þátt í hvetja liðið sitt áfram og fagna þeim sem vel gengur.

Strákarnir eiga mikið hrós fyrir hvernig þeir mættu til leiks á sunnudeginum eftir 2 slæm töp daginn áður. Þeir rifu sig upp, sýndu mikla baráttu og sigurvilja og voru vel að þessum sigrum komnir. Varnarleikurinn, baráttan, fráköstin og frammistaðan í heild sinni til mikillar fyrirmyndar.

Vítanýting okkar var sérstaklega slæm og hefur ekki verið verri í vetur. En við hittum einungis úr 11 af 47 vítum eða 23%. Eitthvað sem við þurfum að taka á, á næstu æfingum.

Heildarstigaskor helgarinnar var eftirfarandi: Siggi 45, Yngvi 24, Daði 18, Magni 14, Anton 11, Logi 8, Eiður 7, Bjarki 4, Jökull 4, Gulli 2 og Gunnar 1

Íslandsmótið í Grindavík, fyrri dagur

Tveir leikir voru spilaðir í dag sá fyrri var gegn KR og fór hann mjög vel af stað. Við leiddum eftir fyrstu 2 leikhlutana og strákarnir voru að spila vel. Síðustu 2 leikhlutarnir voru ekki uppá það besta hjá okkur og KR-ingarnir gengu á lagið og unnu öruggan sigur. Seinni leikur dagsins var gegn Grindavík og gekk okkur aðeins betur þar á heildina litið. Við vorum þó alltaf skrefinu á eftir þeim og töpuðum með nokkrum mun. Allir strákarnir fengu að spreyta sig í dag. Á morgun eru 2 leikir og strákarnir staðráðnir í að gera betur þá.

Íslandsmótið 12. og 13. febrúar fer fram í Grindavík.

Nú um helgina fer fram 3. fjölliðamótið í Íslandsmóti KKÍ í Grindavík.

Drengirnir þurfa að taka með sér nesti til að snæða á milli leikja, ávöxt og/eða samloku og svo vatn (eða annan drykk). Ekki er heimilt að taka með sér gosdrykki eða sælgæti.

Mæta þarf með búningana sína með sér, fyrir þá sem ekki eiga búning, þá mun ég verða með búning fyrir þá. Það eiga allir að vera tilbúnir 30 mín fyrir leik.

Niðurröðun leikja er eftirfarandi:

Laugardagur 12. febrúar
14:00 Haukar - KR b
16:00 Haukar - Grindavík

Sunnudagur 13. febrúar
10:00 Haukar - Reykdælir
12:00 Haukar - FSU

Áfram Haukar

Breyting á æfingatíma nk. fimmtudag

Æfingin á fimmtudaginn verður í Hraunvallaskóla kl. 20-21, þar sem að Ásvellir eru uppteknir vegna leiks í N1 deild karla í handbolta.

Æfingar þessa viku

Það er æfing á venjulegum tíma á morgun þriðjudag, eða kl. 17 í Hraunvallaskóla.

Ég verð fjarverandi frá miðvikudegi til og með sunnudags í vikunni. Í fjarveru minni mun Óskar Freyr Pétursson (pabbi Yngva) stýra æfingunum á miðvikudag í Setbergsskóla 19-20 og á sunnudaginn kl. 17-18:15 á Ásvöllum. Það verður engin æfing á fimmtudag vegna leiks Hauka og Fjölnis í Iceland Express deild karla. Ég hvet alla drengina til að mæta á leikinn á fimmtudaginn.

Æfingar falla niður

Æfingin á morgun sunnudaginn 30. janúar og á fimmtudaginn 3. febrúar falla niður vegna annarra viðburða á Ásvöllum.

Íslandsmótið 12. og 13. febrúar

Íslandsmótið 12. og 13. febrúar fer fram í Grindavík.

Laugardagur 12. febrúar
14:00 Haukar - KR b
16:00 Haukar - Grindavík

Sunnudagur 13. febrúar
10:00 Haukar - Reykdælir
12:00 Haukar - FSU

Tilkynning

Kæru foreldrar/forráðamenn

Hafnarfjarðarbær hefur boðað lækkun á niðurgreiðslu æfingagjalda 16 ára og yngri fyrir árið 2011. Þar sem Hafnarfjarðarbær hefur ekki skilað frá sér hversu stór hluti skerðingin er þá sjáum við okkur ekki fært á öðru en að innheimta full æfingagjöld fyrir vorönn 2011. Okkur þykir miður að fara þessa leið en teljum það óhjákvæmilegt miðað við þær upplýsingar sem við höfum í dag.

Hægt verður að skipta greiðslum í allt að 6 mánuði með því að hafa samband við íþróttastjóra félagsins á gudbjorg@haukar.is eða í s: 525-8702.

Foreldrar/forráðamenn eru beðnir um að leita til bæjarins með endurgreiðslu.
Við getum því miður ekki sagt til um hvenær endurgreiðslur verða þar sem greiðslur til okkar hafa dregist verulega.

Við viljum hvetja forelda til að nýta sér íbúagáttina sem er opin frá 1.-15. feb. samkvæmt þeim upplýsingum sem við höfum í dag. Einnig viljum við benda á að einungis þeir sem sækja um á íbúagáttinni eiga rétt á niðurgreiðslum.

Með von um jákvæða samvinnu,
Guðbjörg Norðfjörð
Íþróttastjóri Hauka

Körfuboltadagur KKÍ

Körfuboltadagur KKÍ verður í Smáralindinni Laugardaginn 29. janúar næstkomandi í tilefni 50 ára afmælis KKÍ sem ber upp á sama degi. Á staðnum verða körfur fyrir alla aldurshópa og boltar þar sem leikmenn úr efstu deildum karla og kvenna munu stýra leikjum og stöðvum og allir geta prufað körfubolta.
Dagskrá hátíðarinnar:
14.00 Opnun hátíðarinnar í Smáralind
- Afmæliskaka í boði fyrir alla gesti
- Jóel Sæmundsson körfuboltamaður og leikari tekur við stjórninni og stýrir dagskrá og viðburðum.
14.10 Körfuboltastöðvar
leikmenn Iceland Express deilda sprella með gestum og gangandi.
- víti, drippl, skot, stinger, sendingar og fleira fyrir krakka til að prufa
14.30 Leikmenn úr Iceland Express deildum karla og kvenna sýna listir
- 3ja-stiga keppni milli sigurvegara Stjörnuleiks karla og kvenna
- Keppt í einfaldri þrautabraut á tíma
15.00 Formleg setning afmælisársins
Hannes Sigurbjörn Jónsson formaður heldur stutta tölu og kynnir árið, happdrættið og fleiri viðburði á árinu og setur afmælishátíðina og afmælisárið.
15.15 Latibær kemur í heimsókn
15.45 Körfuboltastöðvar halda áfram
- víti, drippl, skot, stinger, sendingar og fleira fyrir krakka til að prufa
17.00 Formlegri dagskrá lýkur
Að auki verða plaköt gefin, Playstation kassar með NBA Jam leiknum verður á staðnum fyrir gesti að prófa svo eitthvað sé nefnt.

Sunnudagsæfingin 23. janúar fellur líka niður

Sunnudagsæfingin 23. janúar fellur því miður líka niður vegna leiks mfl. kvenna í Iceland Express deildinni, Haukar - Fjölnir kl. 17:30

Æfingin fimmtudaginn 20. janúar fellur niður

Æfingin fimmtudaginn 20. janúar fellur niður vegna leiks Hauka og KR í Iceland Express deild karla. Hvet alla til að mæta á leikinn sem hefst kl. 19:15

ATH það er búið að seinka leiknum til kl. 20:00
.

Breyttur æfingatími sunnudaginn 16. janúar

Æfingin 16. janúar verður kl. 16:30-17:45 á Ásvöllum.

Stökkkraftur

Á æfingu fyrir jólin mældum við stökkkraft drengjanna og ætlunin er að gera það aftur í vor. Þeir sem stukku hæst voru:

1. Anton (42 cm)
2. Eiður (41 cm)
3. Brynjar Dagur og Magni (38 cm)

Aðrir voru þar skammt á eftir.

Mæting fram að áramótum

Alls voru 60 æfingar fram að áramótum og mætingin hjá drengjunum var eftirfarandi:

Þrettándagleði og frítt á leikinn

Á fimmtudaginn eiga strákarnir leik við Hamar frá Hveragerði kl. 19:45. Frítt verður á leikinn í boði SUBWAY og vil hvetja drengina til að mæta á leikinn og taka mömmu, pabba, ömumu og afa með.

Dagskráin byrjar fyrr því kl. 18:00 hefst Þrettándagleði á Ásvöllum með tilheyrandi gleði, söng, dansi og flugeldasýningu. Því tilvalið fyrir fjölskyldur að eiga skemmtilegt kvöld saman.

Æfingin sem vera átti þetta kvöld fellur niður.

Fyrsta æfing á nýju ári

Fyrsta æfing á nýju ári verður miðvikudaginn 5. janúar kl. 19 í Setbergsskóla.

Æfingin á fimmtudag 6. janúar fellur niður vegna leiks hjá meistaraflokki karla í körfubolta. Leikurinn hefst 19:45, hvet alla til að mæta og styðja strákana.

Æfingin sunnudaginn 9. janúar fellur einnig niður, vegna Actavis mótsins.